ҲУНАРМАНД АЁЛЛАРИМИЗ

ЗАМОНАВИЙ ҚИШЛОҚ АЁЛИ

Мамлакатимиз мустақилликка эришгандан буён юртимизда кўплаб ўзгаришлар рўй берди. Ҳаётимизнинг барча жабҳаларида янгиланишлар, бунёдкорлик ишлари ҳар қандай одамнинг ақлини шоширади. Жумладан, хотин-қизлар, ҳунарманд ва тадбиркор аёллар фаолиятини қўллаб-қувватлаш, уларга кенг имкониятлар яратиб бериш борасидаги ишлар алоҳида эътиборга молик.

Ўзларига берилган ана шу имкониятлардан унумли фойдаланиб, тадбиркорлик йўналишида самарали фаолият олиб бораётган опа-сингилларимиз сафи йилдан-йилга ортиб бормоқда. Уларнинг аксарияти ўз салоҳиятларини намойиш этиб, давр билан ҳамнафас қадам ташламоқда. Ана шундай аёллардан бири, Бўз тумани Гузар маҳалласида яшовчи моҳир ҳунарманд Тўхтахон опа Тешабоевадир.

Мана қариийб 40 йилдирки, у қўл меҳнати, яъни чеварлик, миллий каштачилик, гилам тўқиш фаолияти билан шуғулланиб, оиласига яхшигина даромад келтирмоқда, эл-юрт орасида ҳурмат-эътибор топмоқда. Юртдошларимизга ҳунарманд-чилик маҳсулотлари етказиб бериш билан бирга, ёш қизларга ўз ҳунари сирларини ўргатиб келмоқда.

- Дастлаб бичиш-тикишни онам, моҳир чевар Турсиной Йўлчибоевадан ўрганганман, - дейди Тўхтахон опа. - Болалигимданоқ ҳунар ўрганишга меҳрим тушган. Бу менга аниқ мақсад сари интилишга туртки берди. Бичиш-тикиш сирларини ўрганиб олгач, дўппи тикиш ҳунарини эгалладим. Сўнг каштачиликда ҳам ўзимни синаб кўрдим.

Интилганга толе ёр деганларидек, натижа ёмон бўлмади. Бу ҳунарни ҳам мукаммал ўрганиб олдим. Каштачилик жуда нозик иш, у кишидан катта сабр ва матонатни талаб этади. Ана шу машаққатларга чидаган кишигина ҳақиқий ҳунарманд бўлиб етишади.

Ҳа, сабр, ирода ва интилиш туфайли Тўхтахон опа моҳир каштачилардан бирига айланди. У каштачилик йўналишида жуда кўп ишлар қилди, асарлар яратди. Айниқса, шеърият мулкининг султони Алишер Навоий суратини сочиққа каштачилик асосида акс эттирганлиги ҳақиқий санъат асари сифатида кўпларнинг эътиборига тушди. Бундан ташқари, у гилам тўқиш ҳунарини ҳам пухта эгаллаган.

Тиниб-тинчимас, ҳамиша олға интилувчи Тўхтахон опа Тешабоева ҳунарлари ортидан элга танилди. Унинг эришган ютуқларига барча бирдек ҳавас қилади. Тўхтахон опа "Замонавий ўзбек қишлоқ аёли", "Ташаббус" кўрик-танловлари, турли кўргазма ва ярмаркаларда фаол иштирок этиб, ғолиб ва совриндорлар қаторидан жой олди. Туман ва вилоят ҳокимларининг "Фахрий ёрлиқ"лари унинг меҳнатларига берилган муносиб баҳодир.

Вилоятимизда кичик бизнес ва хусусий тадбиркорлик субъектлари қўллаб-қувватланаётганликлари самараси ўлароқ, Тўхтахон опа Тешабоева ҳам миллий каштачиликни ривожлантириш мақсадида, "Микрокредитбанк" Бўз тумани филиалидан икки марта имтиёзли кредит олди, фаолиятини кенгайтирди, 40 дан ортиқ иш ўринлари яратди. Доимий иш ўрнига эга бўлганларнинг аксариятини коллеж битирувчилари ташкил этади.

От ўрнини той босади, деганларидек, бугун Тўхтахон опанинг набираси бувисининг изидан бориб, ҳунармандчилик сирларини пухта ўрганди, тадбиркорлик борасидаги ишларига яқиндан ёрдамлашмоқда.

Мухтасар айтганда, турмуш ўртоғи билан 5 нафар фарзандни тарбиялаб, элга қўшган, 9 нафар набиралар ардоғида яшаб, намунали фаолият олиб бораётган Тўхтахон опа маҳалланинг, юртнинг фидойи, замонавий қишлоқ аёлларидан бири десак, асло муболаға бўлмайди. Чунки у ҳунари орқали юртимиз равнақига муносиб ҳисса қўшмоқда. У каби ҳунарманд ва тадбиркор аёлларимиз сафи ортаверсин.

Муштарий КАТТАБОЕВА.

Суратда: ҳунарманд

Т. Тешабоева набираси билан.

Р.Араббоев олган сурат.