ИФТИХОР

ШУ ЮРТДА ЯШАМОҚЛИК БАХТ

Мустақиллик - энг олий неъмат. Унинг қадрини ҳис қилишнинг ўзидаёқ сарҳадсиз шукрона бор. Кечаги ва бугунги кунни сарҳисоб қилиш, унинг суратларида ўзликни англаш, ҳурриятнинг нақадар улуғворлигини ҳис этиш қалбда ғурур туйғусини уйғотади.

Ватанимиз мустақил тараққиёт йўлининг залворли ютуқларини қўлга киритиш баробарида озмунча машаққатларни бошидан ўтказмади. Истиқлол туфайли алқимиз бунёдкорлик салоҳиятини намоён этмоқда, ҳаётимиз фаровонликка, осойишталикка юз тутди. Сокин ухлаб, тинч уйғонмоқ хотиржамлигини берди истиқлол. Ўз уйимизни, маҳалламизни, серқуёш ўлкамизни асрамоқ, ётлардан ҳимоя қилмоқ эркини қўлимизга тутқазган ҳам ҳурриятдир.

Шонли тарихимизга назар солайлик. Кўз ўнгимизда эрк йўлида қурбон бўлган мардлар сиймоси гавдаланади. Улар босиб ўтган шавкатли, маърифатли йўл бизга ибрат мактабини ўтамоғи лозим. Аслида тарихнинг ўзи - мактаб. Машҳур адиб Абдулла Қодирийнинг "Мозийга қайтиб иш кўрмоқ хайрлидир", деган пурмаъно сўзларини эсламоқ замирида ҳам ўтмишнинг қора ва оқ саҳифаларини кўздан кечирмоқлик, хатоларни такрорламаслик ва эркка ташналик йўлидаги курашларни мудом ёдда тутмоқлик, кечаги машаққатларни дилдан ҳис қилиб, озодликнинг қадрига етмоқлик туйғулари мужассам.

Истиқлол бизга жуда катта имкониятларни туҳфа этди. Тарихан жуда қисқа муддат ичида жаҳон мамлакатлари орасида Ўзбекистон ўзининг мустақил давлат сифатидаги ўрнини мустаҳкамлади. Илму маърифатда, спортда, қолаверса, ҳаётнинг ҳар соҳасида дунё ичра ўз номини, шонини тарата олди. Куни кеча муҳтарам Юртбошимиз истиқлолнинг 24 йиллик тантанасида сўзлаган нутқида Ўзбекистоннинг бахт индекси бўйича 158 та давлат ичида 44- ўринда, МДҲ давлатлари ичида эса 1- ўринда эканини таъкидлаганларида, бу муносибликдан ифтихор туймаган, кўнгли тоғдек кўтарилмаган юртдошимиз бўлмаса керак?!

Дарҳақиқат, бу заминда, бу муқаддас тупроқда яшамоқ - бахт. Ахир эркин ҳаёт кечирмоқ, эркин болалик завқини сурмоқ, эркин ўқимоқ-ўрганмоқ, эркин ишламоққа не етсин?! Бизга мана шундай чексиз имкониятларни ҳадя этган бетакрор, ягона, она Ватан - Ўзбекистон бағрида истиқлолга шукрона айтмоқ, унинг қадрига етмоқ ҳар биримизнинг бурчимиздир.

Нафиса АБДУЛЛАЕВА,

Андижон иқтисодиёт коллежи ўқитувчиси.